MISIÓN RESCATE

Necesito toda a vosa axuda, prestade atención á mensaxe. Ás veces vai moi rápido e teredes que pausar o video para entender ben o que tedes que facer para liberar ao noso amigo!

MIGUEL INVESTIGA SOBRE OS PAXARIÑOS DOS SEUS PASEOS

Cantas cousas nos poden contar os nosos pais ás veces, verdade? Atentos e atentas ás cousas que lle contan a Miguel.

OS PAXARIÑOS QUE VE GUILLE NOS SEUS PASEOS

Guille decidiu botarlle imaxinación e contarnos un conto para falar dos paxariños que atopou nos seus paseos:

ANDORIÑAS NOS PASEOS DE CARLOS

Non vos pasa como a min, que xa hai ven tempo que vemos poucas andoriñas, pois mirade, Carlos atopou unha no seu paseo:

A FAMILIA LÓPEZ PÉREZ ATACA DE NOVO!

Mirade canto deron de si os paseos de Jaime e a súa familia. 

Non me digades que non é para emocionarse:

PAXARIÑOS DOS NOSOS PASEOS

Toca agora investigar sobre eses paxariños que atopamos nos nosos paseos. 

Eu, nos meus paseos, sigo a escoitar o cuco, aínda que din que vai marchando cando comeza o verán. Unha mágoa que non conseguín facerlle unha foto para ensinarvos. Sempre lembro que cando o escoitaba de pequena co meu pai e o cuco cantaba: "cu-cu" meu pai contestaba: "cu-cu, tapa o cú"; para facerme rir.

Lembrades aquel paxaro tan bonito que vimos un día no patio? lembrades que era unha pega (hurraca en castelán)?

A ver que paxariños atopades vós nos vosos paseos, lembrade falar do paxariño e poñer algo da vosa parte! Déixovos aquí algún exemplo dos que podedes atopar (aínda que se me ocorren algúns máis).

Animádevos a enviarme unha pequena narración de calquera tipo, como a das árbores e as flores, aínda que será moi difícil que logredes unha foto, pero podedes debuxar ou incluso facer unha banda deseñada. Envíadema ao correo para que a poida subir logo ao blog!

Deixovos aquí tamén unha bonita lenda sobre o paporroibo:

O que si vos podo ensinar é un "merlo" que ven cada mañá a petar na fiestra da cociña. Ocórresevos alguna razón para que faga isto?

POTENCIANDO A NOSA ENERXÍA

Imos practicar un pouquiño como se fosemos superheroes e superheroinas! 

Que vos parece? doado ou difícil seguir o ritmo?

(tedes que premer en "disfruta de este video en youtube")

E este para os que non o coñecedes aínda:

ARTISTA DIEGO

Aínda onte falamos do día internacional dos museos e hoxe presentamos a un gran artista que temos no cole, NORABOA DIEGO!

PINGÜÍNS NO DÍA INTERNACIONAL DOS MUSEOS

Onte foi o día internacional dos museos co lema: 

Museo para a igualdade: Diversidade e inclusión.

Que mellor maneira de visibilizar a inclusión, que con esta noticia:

A situación que estamos a vivir, está deixando imaxes que quedarán para sempre no recordo. A falta de persoas nos lugares habituais fai que aparezan animais en lugares inesperados. O exemplo son estes tres Pingüíns do zoolóxico de Kansas City.

Según o director do museo, estaban máis entusiasmados con Caravaggio que con Monet (dous pintores que coñeceran as vosas familias e que coñeceredes máis afondo no instituto).

Os pingüíns de Humbolt (a súa especie) están perdendo o seu hábitat e sofren de sobrepesca, que agota o seu alimento.

"Os pingüinos non poden falar, pero cremos que a experiencia no museo foi moi enriquecedora para eles"- comentou o portavoz do zoolóxico.

*PREGUNTA: Despois da experiencia de estar unha tempada pechados na casa, sen poder saír; Que pensades vós dos zoolóxicos?

Fonte: https://www.20minutos.es/gonzoo/noticia/4261148/0/pinguinos-aburridos-zoo-kansas-hacen-excursion-museo-arte/

XOGOS POPULARES

Xogastes algunha vez ás "chapas"? A verdade é que nunca vos vin xogar no patio do colexio. Nunca é tarde para empezar a rememorar os xogos de antes que precisaban moi pouco material e eran o entretemento que tiñamos no noso tempo de lecer. 

Preguntade na casa a que xogaban de cativos na vosa familia? seguro que facemos unha longa lista entre todos e todas!

A PROFE RECOÑECE O SEU ERRO

Lembrades aqueles tempos nos que traballabamos na nosa aula? Esa aula que nos quedara tan chula despois do nadal? Pois seguro que tamén lembrades cando eu dicía que non esquecerades poñer o "til" ás palabras, agora teño que corrixir o meu erro e espero que así non vos esquezades NUNCA.

É A MELLOR MANEIRA DE APRENDER, cometendo erros coma este (que logo nunca esqueceremos dicir ben):

AS PITAS BAIXO A CHOIVA

Continuamos coa "nosa lingua" nestes días, con esta lectura que nos fai a familia López Pérez dun libriño moi bonito de Carvalho Calero: "AS PITAS BAIXO A CHOIVA". 

É un conto infantil no que nos conta, á súa maneira, algo que lle pasou cando era pequeno. Como o libro está escrito hai máis de 50 anos, complícasenos un pouco o vocabulario que emprega, pero Javi vai dar mostra de todo o que aprendeu nas clases de teatro.

(Que ben aproveitado o paseo de hoxe, que sacaron tempo para ir mercar o libro) 

Escoitade ata o final, xa que a nai de Javi e Jaime vainos sorprender cun fermoso GLOSARIO! (Javi tamén sabe canto nos gustan).

Graciñas familia!!

PREGUNTA: Cal foi a palabra do conto que máis vos gustou?

(A min encantoume: "pequeneira")

SCAPE ROOM LETRAS GALEGAS

Aquí nos deixa a profe Marta unha proposta para investigar un pouquiño sobre a vida de Ricardo Carvalho Calero.

Premede na imaxe para comezar co "scape room".

E aquí vou deixar un "scape room" un chisco máis difícil para facer coa familia 

(premede sobre a moeda):

AGASALLO DE JAIME PARA TODO O COLE

Para conmemorar, que o domingo é o día das letras galegas, dende 4º queremos animar a todo o cole (alumnado e familias) que, durante estes días, prestemos un chisco máis de atención á nosa lingua. Podedes enviar vídeos que iremos subindo ao blog, como este tan bonito que nos mandou Jaime. 

Escoitade atentamente este conto tan bonito que nos relata con tanta ilusión:

XIMNASIA CEREBRAL

Siii! dixen XIMNASIA! A Educación Física non só é física, tamén precisamos exercitar a nosa mente para poder realizar correctamente os movementos. Hoxe imos tentar os de retos que nos porpoñen dende a Asocición Aceesca. Animádevos a deixar en comentarios ata que reto conseguistes chegar!

FLORES QUE SEGUIMOS ATOPANDO NO CAMIÑO...

Palabra para o glosario: acio. A ver quen sabe dicir o que significa (deixade nos comentarios).

MÓVETE NA CASA!

Hoxe imos traballar un pouquiño a forza, coordinación e resistencia do tren inferior! Que vos parece?

Comezaremos con movilidade articular, coma en clase. Xa o tedes máis que aprendido, pero así concentrámonos nas articulacións das extremidades inferiores.

Veredes no video unha palabra que nunca vimos na clase, quen me pode dicir cal é e o seu significado? 

Con moito coidadiño, non vos manquedes! Ocórreseme agora recordar un video de "digocho eu" do 1 de abril.
A ver que vos parece:

AS FLORES DA CONTORNA DE JAIME

E aínda tivo tempo de inventar un conto para nós...

JAIME ESPERTOU A MIÑA CURIOSIDADE E...

Quen é Duck? A historia do mítico pato de LEGO:

Moitos de vos xa o coñeceredes, famoso polas súas viaxes e polas curiosidades que nos mostra arredor do mundo, pero...quen é el? Duck é a imaxe icónica de LEGO®; e todo ven pola súa incrible historia...

LEGO Group fundouse no ano 1932 por Ole Kirk Kristiansen en Billund, Dinamarca, pero daquela, Ole Kirk non se adicaba á creación dos míticos bricks LEGO, senón que traballaba como carpinteiro e ebanista. En 1934, pasou a adicarse á venta de xoguetes de madeira, o produto máis exitoso do seu obradoiro de carpintería. Así que, entre os seus traballadores e el, decidiron que “Fábrica de Mobles de Billund” non  era o mellor nome para unha xoguetería… apareceu LEGO! O nome LEGO significa a contracción en danés de leg godt (“xoga ben”), e hoxe representa a filosofía da empresa.

Como xa nos dixo Jaime, o xoguete favorito de Ole Kirk era un pato, imaxe da marca dende 1935.

Fonte: https://www.robotix.es/blog/duck-historia-mitico-pato-lego/

LEGO FIGURA RETRO

LEGO lanza unha figura retro de madeira para nostálxicos creativos

Os pertencentes a esas máxicas xeracións dos 60, 70 e 80, teñen que ter nas súas memorias ese momento no que os xoguetes tradicionais de madeira comezaron a convivir coa invasión do PLÁSTICO que supuxo "Barbie" ou os "Geyperman".

Antes de que os xoguetes foran robóticos, nenos e nenas tiñan que desenvolver a súa creatividade con xoguetes de formas e materiais básicos que podían ser o que as súas mentes quixeran que foran.

A recoñecida firma LEGO, alonxouse do estilo colorido das súas pezas de cores, lanza en edición limitada, un boneco de madeira inspiración "retro e vintage".

Na honra ao deseño orixinal de 1978.

Mirade o que se pode facer con ela:

Fonte: cultura inquieta

VIAXANDO AO MEDIEVO CON 5º

Un gran aplauso por estes deseños tan chulos que fixeron en 5º para sociais:

TAN LONXE COMO AO NEOLÍTICO!

QUE VOS PARECEN ESTAS CONSTRUCIÓNS DO NEOLÍTICO DE NOA E CARLOS?

CATAPULTEANDO!

BOTÁDELLE UN OLLO A ESTAS CATAPULTAS QUE FIXERON MIGUEL E NOA!

ENQUISA VIDA SAUDABLE

Aquí chegou a enquisa da profe Leli da que vos falei! 
Lede con atención e pensade ben as respostas.

Cando rematedes de contestar todas as preguntas non vos esquezades de premer "enviar".

Ánimo, que a profe Leli fíxoa pensando moi ben en todo o que traballamos sobre este tema, tanto na aula de ciencias con 3º coma nós en educación física. 

Mostrádenos como de ben vos coidades!

(é mellor que o fagades dende un ordenador, xa que no móbil ou nunha tableta pode que non vexades ben as opcións)

PREME NA IMAXE PARA COMEZAR

UN CHISQUIÑO DE GALEGO

Neste días seguro que escoitamos palabras como estas en castelán. Agora imos ver como se din, correctamente, en galego:

Que opinades de todo isto? pillounos de sorpresa o canceliño eh!

OBSERVAMOS NO NOSO PASEO...

Mirade o que atoparon Jaime, Carlos e Noa nos seus paseos...

Animádevos a facerlle preguntas sobre esas árbores que foron atopando!

VELOCIDADE DE REACCIÓN

A velocidade de reacción é necesaria na maioría dos deportes:cando eres porteiro/a e tes que parar un gol, na saída dunha carreira... 
Tamén é necesaria na vida cotiá, por exemplo, cando vai caer algo dunha mesa e consegues collela a tempo.

 Veña botade man da xentiña que vive con vós para competir e mellorar esa velocidade de reacción!


 Que situación deportiva ou da vida cotiá cree que precisa de velocidade de reacción? 
Deixade a resposta nun comentario.

SORPRESAS DO PASEO

Mirade a quen atopei durante o meu paseo das oito, no adro da igrexa:

A ver quen me pode dicir outro nome que recibe este animaliño, en galego?

MAIO MARGA

Mirade como fai, a profe Marga, honra ao seu nome; que fixo un precioso "MAIO" coa súa filla pequena:

OS MAIOS!

Como segue?,"cando marzo maiea, maio..."


E aquí  chega Jaime cun "Maio" que elaborou xunto co seu irmán, aproveitando o seu paseo!

Se estivesemos no cole... recibirías un GRANDÍSIMO APLAUSO!!!!!

Espero que se anime alguén máis, aproveitade ese paseo que xa podedes facer!

O PRADO COBRA VIDA

PARA VER EN FAMILIA

Aquí temos unha proposta que nos envía Belén (nai de Mariola e Carlos) para que vexades os cadros máis famoso do Museo do Prado dun xeito ben distinto ao que estamos acostumados:

DÍA DO LIBRO DE 5º

MIRADE CANTA ILUSIÓN LLE PUXERON EN 5º 

PARA FESTEXAR O DÍA DO LIBRO:

Deixade algún comentario! que ben o merecen!

RELAXÁMONOS UN CHISCO

Aproveitando que a profe Marta me mandou este póster tan chulo, que nos facilita unhas posturas moi sinxelas, imos relaxarnos un pouquiño hoxe. Sería ideal que participasedes todas a familia. Podedes seguir enviando videos ao meu correo para futuras publicacións!

Mais recursos para Ioga aquí

MOVÉMONOS UN CHISCO CON MOITO RITMO!

XA ESTÁ AQUÍ!

Desculpade que falten anacos de vídeos, pero non foi doada a xuntanza de tantas formas e formatos distintos.

O que non podedes negar é o bonito que queda un bo traballo en equipo!

Como Raúl quedou "xeado", imos darlle un minutiño de gloria!
Atentos e atentas á versión "cucharacha covid":

A COUSA VAI DE CARAVEIS

A VER QUEN SABE QUE SE CONMEMORA HOXE?

DIA DO LIBRO LECTURA NOA

Seguimos coas lecturas para conmemorar o día do libro. Eu tamén vos recomendo a lectura deste libro que está cargadiño de historias moooi interesantes!

ASHLEY FIOLEK

Despois de escoitar a lectura de Noa, non soamente me entraron ganas de seguir lendo o seu libro, senón que tamén quixen saber máis da historia de Ashley. Mirade:

LECTURA DÍA DO LIBRO JAIME

Que ben lle queda a butaca de ler a Jaime, verdade?

ANIVERSARIO JAIME

Soamente se fan 10 anos unha vez na vida!! e non podemos faltar a nosa cita para festexalo:

DÍA DO LIBRO

Que pena que non nos dera tempo a usar o noso "croma" para facer algo tan bonito para celebrar o día do libro. Se vos animades a enviarme un video lendo algún dos vosos libros favoritos poderiamos facer algo así:

Espero comentarios sobre este vídeo ou se lestes algún libro de Roald Dahl? Podedes aconsellarnos algunha das súas obras, ou se tedes curiosidade sobre algunha delas. Ánimo!

MINI CLASE DE ZUMBA

Aquí nos deixan unha mini clase de zumba Noa e a súa nai.

Parabéns Silvia!! Un aniversario moi especial seguro! 

Do que non temos dúbida é de que foi inesquecible!

BOLO PASCUAL DE MEIS

Bolo Pascual

© Concello de Meis

O Salnés

Meis reparte o "Bolo Pascual" máis solidario

Por Oskar Viéitez
hai 3 horas

Lotes do banco de alimentos do Concello de Meis

© Concello de Meis

Este domingo no concello de Meis entregaranse os primeiros lotes de alimentos xunto co "Bolo Pascual", que de maneira benéfica doou a Asociación Cultural de San Gregorio para dar ás persoas máis necesitadas do municipio. 

Despois de quedar sen celebrar a Romaría das Cabezas, esta asociación empeñouse en non perder a tradición do bolo que se prepara con motivo da festa de San Gregorio. Nesta ocasión o doce é un pouco máis pequeno, con 900 ovos fronte aos 6.000 que adoita levar e que cociña Panadería Paradela.

A agrupación local de Protección Civil encargarase da súa repartición.

Desde o Concello de Meis, a alcaldesa Marta Giráldez destacou a solidariedade que están a demostrar os veciños, agradecendo as achegas que se fixeron ao banco de alimentos, especialmente á Asociación de Mulleres Rurais O Salnés, ao Anpa do Colexio Rural Agrupado de Meis e á Asociación Cultural A Vertula, pola súa implicación neste proxecto solidario.

Igualmente agradeceu ás adegas Laureatus, Terras de Asorei e Mar de Frades, por regalar as caixas nas que se farán as entregas

https://pontevedraviva.com/xeral/63228/meis-reparte-bolo-pascual-mas-solidario/